EV is coming

刊於明報周刊MPW 2192期 13.11.2010

Eric 是微薇大學時的同班同學，畢業不久便投身製造業，且短短幾年已經做出成績。 我們一年總有三數次飯敍，最近幾年他都開車接我。


微薇返工放工均以地鐵出入，間中也想過做有車一族，然而只要想到噴出的毒氣和二氧化碳，且在香港生活私家車又不是必需品，便成功抵抗引誘。加上三兩個像Eric的朋友不時都會載我到郊外食飯，只為了做weekend driver而買車，並不划算。Eric可不同，少年得志，畢業幾年不到，便以開蓬波子出入，還是最loud的鮮紅色，可謂意氣風發。去年跟他前往赤柱吃飯，車子於淺水灣道上飛馳，勁風在耳畔颯颯作響，確實別有一番感受。所以當他駕着銀色的Prius出現時，登時把我嚇了一跳，覺得真係世界變！



上車後，他提議去西貢食海鮮，我笑笑說無問題，卻不忘揶揄他：「揸這部車怎樣追女仔？」


「你這個淡綠主義者，難道不知道現在關心環境、關心地球才夠潮夠型？ 」


「你真的因此而換車？」Eric讀工程出身，對機件製作要求嚴格，尤其欣賞複雜而精緻的設計，所以他鍾情「波子」，我完全理解。


「這部車的科技設計難度甚高，油電混合的hybrid系統十分複雜，暫時只做到低排放，而非零排放。Hybrid是過渡性安排，電池容量有限，不過當車子下斜坡，平路減速或剎車時，內置的制動系統會把動能轉化成電能儲電。整個系統十分值得欣賞，自動決定幾時儲電，幾時用電油推動， 幾時雙管齊下！」


「嘩！咁佢咪醒目過你？ 」


他繼續興致勃勃講個不停︰「嗱！現在油電一齊，雙管齊發， 幾有力！ 車子僅1800c.c.，但卻像2500c.c. 一樣！ 」


「那你令我少吸了幾多廢氣？」我微薇一向對廢氣排放有意見！


「微薇公主，我一早都預咗你會問！混能車的廢氣排放只是傳統汽油車的兩三成！再講能源效益，在波子的時代，一公升電油行六至七公里，跟這hybrid同級的車可行十幾公里，我這部車卻可以行二十多公里！你的氣管應該會好過點啦！ 」


「現正在過東隧，真的要多謝你讓我不用再食塵！ 」我記得開篷過隧道的日子，熱氣撲面而來之外，還要看着一架又一架巨型巴士貨車擦身而過，其噴出的黑煙直吸入肺！


「其實最終目標還是零排放，而距離這個可能亦不會太遠。我們第一年上堂都知道，最大問題是電池，要夠輕又夠勁，現在大部分電動車都用手提電腦的鋰電池，貪其較輕又耐用，充電一晚應該可以行百多公里。香港不算很大，夠用到極。問題是電池成本、儲電設施、無電時怎樣換電等配套措施。中電說將會有18個停車場設置充電站，另外商場如奧海城和中港城等，今年更推出免費充電服務。日本車已經全力發展電動車﹕日產有Leaf，三菱有iMiev，本田、豐田明年都會有全電動車出爐。連中國比亞廸都打算發展，EV is up and coming。除了環保，經濟因素亦很吸引。我計過，廿公里用電大約$2.8，用電油差不多$20，你話有冇得比? 」


此時車子已駛近西貢，只見窗外霞彩漫天，海面泛着點點金光。看着如斯美景，我不禁想，或者香港空氣和氣候暖化還有一絲希望？


我轉頭向Eric笑說： 「下次一齊食飯，記住要揸你這部銀色EV﹗」